Su və Daşqınların İdarəetməsi üzrə Hesabat Seminar keçirilmişdir.

Wed May 21 00:00:00 EDT 2014

Seminarda 2013-cü ildə görülmüş işlərin yekunu təqdim edilmişdir.

21 may 2014-cü il tarixində “Qafqaz Baku City” (Şamdan Zalı) otelində BMT-nin İnkişaf Proqramı və Fövqəladə Hallar Nazirliyinin “Böyük Qafqaz regionunda zəif dağ icmaları tərəfindən su və daşqınlar üzrə idarəetməyə iqlim dəyişikliyi risklərinin daxil edilməsi” birgə layihəsi üzrə Hesabat Seminarı keçirilmişdir. Seminarda layihə üzrə 2013-cü ildə görülmüş işlərin yekununa dair hesabat verilmiş, gələcək tədbir və planlar üzrə müzakirələr aparılmışdır. Eyni zamanda, beynəlxalq ekspertlərin layihə çərçivəsində etdikləri səfər, gördüyü işlərə dair ətraflı məlumat verilmiş və sonrakı fəaliyyət planı müzakirə edilmişdir.

Tədbir iştirakçılarını salamlayan BMT-nin İnkişaf Proqramının Proqramlar üzrə meneceri cənab Məzahir Əfəndiyev layihənin uğurla davam edildiyini və planlı şəkildə layihə məqsədlərinə nail olunduğunu vurğulamışdır. Belə layihələrin vacibliyini tədbir iştirakçılarına bildirən Fövqəladə Hallar nazirinin müavini cənab Tapdıq Əmiraslanov Nazirliyin BMT-nin İnkişaf Proqramı ilə daha sıx əməkdaşlıq etməsində maraqlı olduğunu söyləmişdir. BMT İP-nin Rezident Nümayəndəsinin müavini xanım Nato Alhazişvili öz növbəsində bu sahədə beynəlxalq təşkilatın Azərbaycana hər zaman dəstək göstərəciyini bildirmişdir.

Daha sonra Baş Milli Məsləhətçi cənab Fərid Abbasov layihə çərçivəsində görülmüş işlər və gələcək planlar haqqında, Baş Texniki Məsləhətçi cənab Devid Milton isə layihənin Strateji inkişafı barədə geniş təqdimatlar etmişlər. Yerli və beynəlxalq ekspertlərin görülmüş işlər barədə qısa icmalının təqdimatından sonra tədbir müzakirələrlə davam etdirilmişdir.

Hesabat Seminarında Fövqəladə Hallar Nazirliyi, BMT-nin İnkişaf Proqramı, Ekologiya və Təbii Sərvətlər Nazirliyi, Kənd Təsərrüfatı Nazirliyi, Su Ehtiyatları Dövlət Agentliyi, AzərSu ASC, Azərbaycan Meliorasiya və Su Təsərrüfatı ASC, Dövlət Torpaq və Xəritəçəkmə Komitəsinin əməkdaşları və KİV-in nümayəndələri iştirak etmişlər.

Xatirladaq ki, 2012-ci ildən həyata keçirilən bu layihənin məqsədi su və daşqınlar üzrə idarəetməni təkmilləşdirməklə Azərbaycanın Böyük Qafqaz regionundakı dağ icmalarının su çatışmazlığı, sel və daşqın təhlükələrinə qarşı zəifliyini azaltmaqdır. Layihədə qanunvercilik və siyasət səviyyəsində idarəetmə bazasının təkmilləşdirilməsi, təşkilati bacarıqların gücləndirilməsi və icmaların su və daşqınlar üzrə idarəetmədə fəal iştirak etmələri üçün təlimlərin keçirilməsi nəzərdə tutulmuşdur.

Əlavə məlumat üçün

Ruslan Ismayıl-zadə, Media və ictimai əlaqələr üzrə məsul şəxs, ruslan.ismayilzada@undp.org