Qulam İsakzai BMT-nin Azərbaycandakı Rezident Əlaqələndiricisi və BMTİP-in Rezident Nümayəndəsi təyin edildi

Wed Apr 06 00:00:00 EDT 2016

Bakı, Azərbaycan – Bugün, yeni təyin edilmiş Birləşmiş Millətlər Təşkilatının Azərbaycan Respublikasındakı Rezident Əlaqələndiricisi və BMT-nin İnkişaf Proqramının (BMTİP) Rezident Nümayəndəsi cənab Qulam İsakzai öz etimadnaməsini Xarici İşlər Nazirliyinə təqdim etdi.

Cənab İsakzai BMT sistemində və Asiya və Yaxın Şərqdə fəaliyyət göstərən beynəlxalq QHT-lərdə beynəlxalq inkişaf, humanitar böhran vəziyyətləri və münaqişədən sonrakı bərpa işlərində 22 illik iş təcrübəsinə malikdir. O, yoxsulluğun azaldılması, səmərəli idarəçilik və qanunun aliliyi, ətraf mühit və təbii fəlakətlər zamanı idarəçilik, habelə könüllülük və vətəndaş cəmiyyəti ilə bağlı proqramlara rəhbərlik etmiş və idarə etmişdir.

O, bundan əvvəl, BMTİP-in Tacikistandakı Nümayəndəliyində baş müşavir və Ölkə üzrə direktor əvəzi qismində və BMT-nin Koreya Xalq Demokratik Respublikasındakı Rezident Əlaqələndiricisi və BMTİP/BMT Əhali Fondunun Rezident Nümayəndəsi vəzifəsində (2013-2015-ci illər) çalışmışdır. Buna qədər, cənab İsakzai, Almaniyada Birləşmiş Millətlər Təşkilatının Könüllüləri nəzdində İnkişaf Bölməsinin rəhbəri (2008–2013-cü illər) olmuşdur. 2005-ci ildən 2008-ci ilədək, o, BMTİP-nin Nepaldakı Rezident Nümayəndəsinin müavini olmuşdur. 2003-cü ildən 2005-ci ilədək olan dövrdə, o, BMTİP və BMT-nin Əfqanıstandakı Yardım Missiyası (UNAMA) yanında Tərksilah, Tərxis və Reinteqrasiya Proqramında Proqram Məsələləri üzrə baş müşavir qismində yenidənqurma prosesinə yardım etmək üçün öz doğma ölkəsinə qayıtmışdır. Cənab İsakzai Yəməndə Rezident Nümayəndənin köməkçisi və İdarəçilik Bölməsinin rəhbəri (2001–2003-cü illər) və Suriyada BMT-nin Yaxın Şərq üzrə Xüsusi Əlaqələndiricisinin (UNSCO) Ofisində Proqram Məsələləri üzrə baş müşavir olmuşdur (2000–2001-ci illər). 1997–1999-cu illərdə, o, Bağdadda və İraqın Kürd əyalətində BMT-nin İraq üzrə Humanitar Əlaqələndiricisinin Ofisində çalışmışdır. BMT sistemində fəaliyyətə başlamazdan əvvəl, cənab İsakzai Amerika Birləşmiş Ştatlarında özəl sektorda (1993 – 1995-ci illər) çalışmış və Pakistanda “Uşaqların Xilası” (ABŞ), “Azad Tibb” və “İsveçin Əfqanıstan üzrə Komitəsi” kimi (1986–1990-cı illər) beynəlxalq QHT-lərdə müxtəlif vəzifələr tutmuşdur.

Cənab İsakzai ABŞ-ın Massaçusets ştatında Hüquq və Diplomatiya üzrə Fletçer Məktəbində beynəlxalq ümumi hüquq üzrə magistr dərəcəsi və ABŞ-ın Nebraska ştatında Midland Universitetində, fərqlənmə diplomu ilə, biznes idarəçiliyi üzrə bakalavr dərəcəsini almışdır.

Əlavə məlumat və müsahibə üçün:

Ruslan Ismayılzadə, İctimai Əlaqələr üzrə məsul şəxs, ruslan.ismayilzada@undp.org