Naxçıvanda sərhəd qurumları üçün milli təlim keçirilir

Thu May 19 00:00:00 EDT 2016

Naxçıvan, Azərbaycan - Bu gün, sərhəd qurumları əməkdaşları üçün milli təlimin açılış mərasimi ilk dəfə olaraq Naxçıvan Muxtar Respublikasında baş tutdu. Sərhəd idarəçiliyinə məsul olan qurumlar, sərhədçilər, immiqrasiya və gömrük əməkdaşlarına “Sərhəd idarəçiliyinə məsul olan qurumların Liderlik və İdarəetmə vəzifələri” adlı üç günlük təlim təşkil edilib. Əsas diqqət sərhəd idarəetməsinin inkişafı, eləcə də maddi və texniki bazanın gücləndirilməsinə ayrılacaq.

Açılış mərasimində hökumət qurumları, BMT-nin İnkişaf Proqramının (BMTİP), Miqrasiya Siyasətinin İnkişafı üzrə Beynəlxalq Mərkəzin nümayəndələri və KİV iştirak etdi. İştirakçıları salamlayan BMTİP-nın Strateji Əməkdaşlıq üzrə müşaviri cənab Məzahir Əfəndiyev Naxçıvanda artıq görülmüş işləri nəzərə çatdırdı və belə təlimlərin iştirakçılara onların gündəlik işlərində qazandıracağı bilik və bacarıqların əhəmiyyətini xüsusilə vurğuladı. Naxçıvan Muxtar Respublikasının sərhəd idarəçiliyinə məsul olan qurumların rəsmiləri belə təlimlərin sərhədçilərin gələcək fəaliyyətlərində müstəsna rol oynayacaqlarını bildirdilər. Miqrasiya Siyasətinin İnkişafı üzrə Beynəlxalq Mərkəzinin beynəlxalq ekspertləri cənab Robert Glökl və cənab Heinz Şneyder müasir sərhəd idarəetmə sistemləri haqqında öz biliklərini paylaşdı və iştirakçıları bu sahədə baş vermiş ən son yeniliklər haqqında məlumatlandırdı.

Bu təlim Dövlət Sərhəd Xidməti və BMTİP-in birgə həyata keçirdiyi və Avropa İttifaqının maliyyələşdirdiyi layihə çərçivəsində təşkil edilmişdir. Adı çəkilən layihənin əsas məqsədi strateji sərhəd idarəetməsi bacarıqlarının artırılması, sərhədlərin qorunması və yoxlanış üsullarının təkmilləşdirilməsi, sərhəd qurumları əməkdaşları üçün təlim proqramlarının inkişafı və yüksək texnoloji avadanlıqlar ilə müasir infrastrukturun yaradılmasıdır.