Azərbaycanın innovasiya mütəxəssisləri işin dəyişən mahiyyətini müzakirə edirlər

18 June 2021

Foto: BMTİP Azərbaycan

Bakı, 18 iyun 2021-ci il – Birləşmiş Millətlər Təşkilatının İnkişaf Proqramının (BMTİP) Akselerator Laboratoriyası, Tech.az və “Next Step” İnnovasiya Mərkəzinin birgə təşəbbüsü ilə işin gələcəyi mövzusunda tədbir təşkil edilib. Tədbirdə Azərbaycanın özəl sektorundan və startap ekosistemindən 40-a yaxın mütəxəssis işin gələcəyi, əmək bazarı tələbləri, həmçinin daha dayanıqlı gələcək naminə tədris proqramlarının müasirləşdirilməsi və yeniliyin təşviqinin əhəmiyyəti ilə bağlı müzakirələrdə iştirak edib.

Tədbir zamanı “İşin Dəyişən Təbiəti” adlı yeni regional hesabat təqdim edilib. BMTİP-nin Azərbaycan, Bosniya və Herseqovina, Serbiya, Türkiyə, Ukrayna və Özbəkistandakı Akselerator Laboratoriyaları tərəfindən hazırlanan bu hesabat - dəyişməkdə olan işin, ümumiyyətlə bu prosesin “harada, kim, necə və niyə” formalaşdığını göstərən 30 məqam haqda məlumat verir.

Hesabatda COVID-19-un işçi qüvvəsinə təsiri, yeni iş modelləri və təşəbbüskar ekosistemlər kimi müxtəlif mövzular istiqamətində imkanlar və təhlükələr, eləcə də dünya miqyasında insanların üzləşdikləri çətinlikləri müsbət cavablara çevirə bilən həll yolları araşdırılıb.

Tam hesabatla buradan tanış ola bilərsiniz:

https://www.eurasia.undp.org/content/rbec/en/home/library/innovation/the-changing-nature-of-work.html

Əlaqə üçün məlumat:

Leyla Qurbanova, BMTİP-nin Azərbaycan ofisi – leyla.gurbanova@undp.org

BMT-nin İnkişaf Proqramı BMT-nin aparıcı agentliyi olub, yoxsulluq, bərabərsizlik və iqlim dəyişikliyi ilə mübarizə aparmaqdadır. Biz, 170 ölkədə müxtəlif mütəxəssis və tərəfdaşlarımızdan ibarət geniş şəbəkəmizlə birgə fəaliyyət göstərərək, planet və insanlar üçün hərtərəfli və dayanıqlı həllər üzərində çalışırıq.

Ətraflı məlumat üçün undp.org vebsaytına baş çəkə yaxud Twitter-də @UNDP səhifəsini izləyə bilərsiniz.